വയനാട്ടിലെ ചൂരല്മലയിലുണ്ടായ ഉരുള്പൊട്ടലില് ദുരിതമനുഭവിക്കുന്നവര്ക്ക് സഹായം അഭ്യര്ത്ഥിച്ചുള്ള മുഖ്യമന്ത്രിയുടെ ഫേസ്ബുക്ക് പോസ്റ്റിനെതിരെ പ്രചാരണം നടത്തിയതിനെതിരെ കേസെടുത്ത് പൊലീസ്.സാമൂഹ്യമാധ്യമമായ എക്സില് ‘കോയിക്കോടന്സ് 2.0’ എന്ന പ്രൊഫൈലില് നിന്നാണ് വ്യാജ പോസ്റ്റ് പ്രചരിപ്പിച്ചത്.ദുരിതാശ്വാസ പ്രവര്ത്തനങ്ങള്ക്ക് തടസ്സമുണ്ടാക്കുകയെന്ന ഉദ്ദേശ്യത്തോടെ പോസ്റ്റ് പ്രചരിപ്പിച്ചതിനാണ് വയനാട് സൈബര് ക്രൈം പൊലീസ് കേസെടുത്തത്.ഭാരതീയ ന്യായ സംഹിതയിലെ 192, 45, ദുരന്തനിവാരണ നിയമത്തിലെ 51 എന്നീ വകുപ്പുകള് അനുസരിച്ചാണ് കേസ്.
ദുരന്തനിവാരണ സഹായത്തിനുള്ള മുഖ്യമന്ത്രിയുടെ അഭ്യര്ത്ഥന തള്ളിക്കളയുന്നതിന് ജനങ്ങളെ പ്രേരിപ്പിക്കുന്ന തരത്തിലായിരുന്നു പോസ്റ്റ്. തെറ്റിദ്ധാരണ പരത്തുന്ന തരത്തില് ഇത്തരം പോസ്റ്റുകള് പ്രചരിപ്പിക്കുന്നവര്ക്കെതിരെ ദുരന്തനിവാരണ നിയമപ്രകാരം കര്ശന നിയമനടപടി സ്വീകരിക്കുമെന്ന് പൊലീസ് അറിയിച്ചു.ഇതിനായി സാമൂഹ്യമാധ്യമങ്ങളില് സൈബര് പൊലീസിന്റെ നിരീക്ഷണം ശക്തമാക്കി.
