ന്യൂഡല്‍ഹി:ഇന്ത്യന്‍ ക്രിക്കറ്റ് ടീം പരിശീലക സ്ഥാനത്ത് നിന്ന് പടിയിറങ്ങിയ രാഹുല്‍ ദ്രാവിഡ് ഐപിഎലില്‍ രാജസ്ഥാന്‍ റോയല്‍സില്‍ ചേരുന്നതായി റിപ്പോര്‍ട്ട് പുറത്ത്.രാജസ്ഥാന്‍ റോയല്‍സിന്റെ മുഖ്യപരിശീലകനായി ദ്രാവിഡിനെ നിയമിക്കാന്‍ ചര്‍ച്ചകള്‍ നടക്കുന്നതായി റിപ്പോര്‍ട്ടില്‍ പറയുന്നു.
ഇന്ത്യന്‍ പ്രീമിയര്‍ ലീഗില്‍ 2010 മുതല്‍ 2013 വരെ രാജസ്ഥാന്‍ റോയല്‍സിന്റെ താരമായിരുന്നു രാഹുല്‍ ദ്രാവിഡ്.പിന്നാലെ 2014, 2015 സീസണുകളില്‍ രാജസ്ഥാന്‍ ടീമിന്റെ ഉപദേശക റോളിലും ദ്രാവിഡ് പ്രവര്‍ത്തിച്ചിരുന്നു. 2013ല്‍ നായകനായിരുന്നപ്പോള്‍ രാജസ്ഥാനെ ഐപിഎല്ലില്‍ മൂന്നാം സ്ഥാനത്തും ചാമ്പ്യന്‍സ് ലീഗ് ട്വന്റി 20യില്‍ രണ്ടാമതും എത്തിച്ചതാണ് രാഹുല്‍ ദ്രാവിഡിന്റെ നേട്ടം.
അതിനിടെ നിലവിലെ പരിശീലകന്‍ കുമാര്‍ സംഗക്കാരയെ നിലനിര്‍ത്തുമോയെന്ന കാര്യത്തില്‍ രാജസ്ഥാന്‍ റോയല്‍സ് ടീം അധികൃതര്‍ വ്യക്തത വരുത്തിയിട്ടില്ല.2021 മുതല്‍ രാജസ്ഥാന്‍ റോയല്‍സ് ടീമിന്റെ പരിശീലകനാണ് സംഗക്കാര. 2022ലെ ഐപിഎല്ലില്‍ രാജസ്ഥാനെ ഫൈനലിലെത്തിച്ചതാണ് സംഗക്കാരയുടെ പ്രധാന നേട്ടം.
